Guddiga Arrimaha Gudaha, Dib u heshiisiinta, arrimaha Federaalka iyo Xiriirka Dowladaha xubnaha ka ah Dowladda Federaalka oo gudnaya waajibaadka ka saran korjoogtaynta iyo la xisaabtanka hay’adaha dowladda, ayaa maanta qabtay dood-cilmiyeed looga hadlay Hannaanka Diiwaangelinta Codbixiyayaasha, Doorashooyinka iyo Amniga Doorashooyinka.
Dooddan ayaa diiradda lagu saaray kor u qaadidda hannaanka doorashooyinka, nidaamka diiwaangelinta cod-bixiyeyaasha, yareynta khaladaadka iyo hubinta hufnaanta geeddi-socodka doorashooyinka dalka.
Xubnaha Guddiga ayaa kulanka ku casuumay dhinacyada ay khusayso arrintan kuwaas oo ay ka mid yihiin Wasaaradda Arrimaha Gudaha, Federaalka iyo Dib-u-heshiisiinta, Wasaaradda Amniga Gudaha, Guddiga madaxa banaan ee Doorashooyinka iyo Soohdimaha, Guddiga Haweenka Qaranka, Gudoomiyaha Haweenka Gobolka Banaadir, Bulshada rayidka Soomaaliyeed, Kaaliyaha Booliiska iyo marti sharaf kale, si loo helo xog, aragtiyo iyo talooyin kala duwan.
Intii uu kulanku socday, waxaa si qoto dheer looga dooday muhiimada Doorasho qof iyo cod ah oo hufan lehna habraacyo dhammaystiraya sharciga Doorashooyinka,
ilaalinta xogta muwaadiniinta, iyo habka loo xaqiijin karo ineey noqoto mid lagu wado kalsoonaan karo, iyadoo doodani ay qayb ka ahayd dadaallada Guddiga Arrimaha Gudaha Aqalka Sare uu ku xoojinayo doorkiisa kormeerka iyo la-xisaabtanka ee Hay’adaha Dowladda.
